摩納哥星散等里劏

猪拉多纳

今晚法甲有場褪色大戰，里昂主場對摩納哥，上季仲係「豪門」嘅摩納哥話咁快已經爆煲，兩大球星占士洛迪古斯、法卡奧先後離隊，其他「僱傭兵」亦因為老闆閂水喉，搞到無心戀戰。戰意往往先至係勝負嘅最關鍵因素，摩納哥士氣低迷，受讓平半都要唔落手，寧揀里昂上盤。

（TVB302周六凌晨2時30分直播）
里昂小將有火讓得起

摩納哥風光不再，好大程度上因為班主魯博洛夫列夫離婚，被分身家，結果要出售占士仔，同外借法卡奧慳皮。老實講，願意加盟摩納哥嘅球星，無非都係為錢，依家球會莫財，個心肯定涼咗一截，即使陣中仲有貝碧托夫、摩天奴等「星」，但恐怕已準備定跳槽。當然里昂情況亦唔好得去邊，但勝在有唔少小將，為博上位，起碼仲有鬥志。尤其係23歲前鋒拿卡錫迪相當弗，4場聯賽轟入3球，一於趁摩納哥爆煲，攞佢哋命。

另外，葡超賓菲加今季星散，鋒線力量大不如前，早前作客新升班嘅博維斯塔，亦僅小勝1比0，冇晒霸氣，今仗到訪塞圖巴爾，隨時又煲魚生粥。德乙波琴主場對卡爾斯魯厄，雙方開季後大勇，預料會火併上演入球騷。