北部打吡 漢堡靠賀治比大變身

猪拉多纳

德甲尾場上演北部打吡，漢諾威主場迎戰漢堡，上輪主場慘吞柏達邦3蛋嘅漢堡喺轉會窗關閉前繼續瘋狂增兵，今晚會有5名新兵首次擔正，包括由熱刺回歸德甲嘅前國腳賀治比，球隊實力無疑提升咗，但呢班新兵始終未夾過，究竟踢成點連佢哋自己都話難估，睇番兩軍近年交鋒入球數字都偏高，今場寧吼大盤。

（有線61及64台周日晚11時30分直播）
5新兵晒冷撼漢諾威

漢堡教練史隆卡前日啱啱度過47歲生日，今晚就要領軍倒戈對番今年二月炒佢嘅前度球會漢諾威，其實佢上季季尾去漢堡救火，就曾經帶隊作客漢諾威，當時球隊人腳唔掂加上士氣低落，最終輸1比2亦好正常，好在球隊最後都成功保住德甲席位。

今季漢堡大事擴軍，但上輪主場竟然大敗畀升班球隊，史隆卡承受沉重壓力，今晚決定嚟個新兵大晒冷，5名擔正新兵包括來自熱刺嘅賀治比、由緬恩斯收購嘅尼古拉梅拿、來自哥連泰斯嘅中堅基巴萊斯、拜仁借將祖利安格連、同埋喺對柏達邦後備上陣踢咗20分鐘嘅前奧格斯堡左閘奧斯特蘇歷，佢5個加埋今季新加盟嘅比哈美，漢堡人腳大變，呢批優質新兵足以為箭頭拉蘇加提供更強供應，入球能力肯定有所提升。

漢諾威今季變動亦多，聯賽首仗即於主場爆冷贏史浩克，士氣正盛，教練泰亞芬哥古特對新加盟嘅攻擊手祖斯盧馬田、清武宏嗣、米高艾保奴斯同拜恩特都好滿意，今晚主場出擊勢必搶攻力爭3分，兩隊鬥攻下大盤可期。