費托初登場AC捧得過

猪拉多纳

意甲近年流失唔少觀眾，但今季卻值得一睇，事關港產小將Antoine Viterale加盟基爾禾，雖然呢位18歲前鋒短期內未必可上陣，但起碼可以吸引更多香港球迷注意。至於AC米蘭簽咗費蘭度托利斯，好多女fans都希望「王子」去到意甲可以翻生，相信呢位西班牙射手今晚處子作會使出渾身解數爭取入波，AC作客帕爾馬開緊平手盤，撐AC啦！

（TVB 301周一凌晨2時45分直播）

AC今季由恩沙基執教，表現比預期好，首仗3比1輕取拉素，恩沙基調兵遣將有料到，仲獨具慧眼，免費簽下唔少好球員，包括上場入波嘅文尼斯。今場焦點自然落喺費托身上，雖然佢近年踢得沉，但轉戰水準較低嘅意甲，以佢嘅波底應綽綽有餘，遠離英超傷心地，亦有助佢重建信心，可望帶來驚喜。帕爾馬只靠卡斯辛奴孭飛，但呢位天才球員年事已高，獨力難支，上仗更輸畀新升班嘅切塞納，唔夠AC砌。
拿玻里炒得起基爾禾

另外，拿玻里歐聯出局，勢必全力爭聯賽，球隊人腳鼎盛，希古恩、荷西卡利祖、咸錫、恩斯治尼、恩拿都好優質，依家專心踢聯賽，相信會有一番作為。主場炒得起基爾禾，直取讓球主勝。

（TVB 302周日晚9時直播）