打比郡+１火燒森林

猪拉多纳

前英軍主帥牙骹戰

咪以為比英超低一級嘅英冠就冇乜睇頭，今晚就有一場爭升班前哨戰，同時亦係前英格蘭主帥大對決，榜首嘅諾定咸森林喺主場對打比郡，森林領隊為前英格蘭U21主帥皮雅斯，打比郡則由曾教過英軍大國腳嘅麥卡倫領軍，雖然兩位教頭喺英格蘭時期劣績斑斑，不過都仲有料教低級球隊嘅，打比郡上季仲爭啲升班成功添，今場受讓值捧啦！

（周日晚8時15分開賽，馬會網上文字直播）
皮雅斯麥卡倫各擅勝場

諾定咸森林今季改由球隊名宿皮雅斯執教，成績大躍進，開季踢咗5場贏咗4場，令人另眼相看，估唔到搞到幼獅喺U21歐國盃羞家出局嘅「阿皮」，嚟到森林一啲都唔水皮！

不過今晚對打比郡先係「阿皮」真正考驗，森林嗰4場勝仗嘅對手，好似雷丁、錫周三等，都唔係升班熱門球隊，但麥卡倫領軍嘅打比郡上季只差一步就升班成功，喺英冠升班附加賽決賽不敵ＱＰＲ，今季球隊捲土重來，成績雖然暫時不及森林，但實力唔比森林差，啱啱仲從利物浦借得翼鋒佐敦艾比，此子被譽為「新史達寧」，有速度之餘身形都幾健碩，多咗呢位強援，打比郡絕對有力同森林周旋到底，捧讓球客勝！