皇馬4條A再炒艾爾切

猪拉多纳

士哥手殺得性起停唔到

今個星期西甲加開快車，皇家馬德里坐鎮巴拿貝迎戰艾爾切。「銀河艦隊」經歷西甲兩連敗後，成班波即時醒晒，喺歐聯怒炒完巴素利，再喺聯賽血洗拉科魯尼亞，唔單止「銀河4條A」個個弗到漏，就連加盟冇耐嘅「小豌豆」查維亞靴南迪斯都有料到，今場鬥級數低一大截嘅艾爾切，讓到2球都要捧1.55倍「讓球主勝」！ （now632台周三凌晨2:00直播）
大勝拉科 創史上首個作客「8+」

「銀河4條煙」基斯坦奴朗拿度、加里夫巴利、賓施馬、同占士洛迪古斯，繼上周中歐聯各省1粒造就皇馬大勝巴素利5:1，緊接西甲作客拉科魯尼亞更愈戰愈勇，C朗連中三元、「大聖爺」梅開二度、「J神」取得西甲開齋波、賓施馬交咗兩球助攻，「小豌豆」後備落場亦唔執輸整番兩粒，一輪狂風掃落葉最後怒炒對手8:2，創下「銀河艦隊」西甲史上首個作客「8+」紀錄。

當中「葵扇煙」C朗計埋鬥拉科上演帽子戲法，數數手指，已經係佢職業生涯第27次「戴帽」，相比宿敵美斯只以1次之差落後。既然難得自己腳風咁順，又撞正隊友撻着晒副偈，C朗梗係想趁勢再次「戴帽」，實行同宿敵平起平坐，何況比比、沙治奧拉莫斯有傷，今場九成以攻代守，所以唔使怕皇馬入完兩球就收手，隨時再度上演大屠殺。
艾爾切輸波打擊士氣

另邊廂，艾爾切雖然冇球員坐波監同受傷，可惜礙於質素所限，今場造訪巴拿貝唔使旨意做到攔路虎。最弊係佢哋前嗰輪聯賽擊敗華歷簡奴後，教頭艾斯基巴懶醒話要砌低埋新升班嘅伊巴，搶分為護級鋪路，結果主場冇分落袋不特止，仲要淨吞兩蛋輸波，嚴重打擊士氣，今晚想唔做炮灰都幾難。
盤路解碼：皇馬上季19次主場出戰西甲，開出11次「主主」。

Data King：皇馬連開4口「半場大」

‧「銀河艦隊」連續4場開出「半場大」。

‧皇馬近43場西甲主場賽事，只有1場冇波入。

‧兩軍上季西甲兩次對碰都開出「入球單」。