阿仙奴主場歎慣刺再添食

猪拉多纳

今晚尾場爆發嘅北倫敦打吡，阿仙奴坐鎮酋長球場迎戰熱刺。阿仙奴領隊雲格重新將「大眼仔」奧斯爾移回中路，令隊波生晒重上正軌，仲有壽星仔基蘭基比斯復出照住，梗係唔怕聯賽三場未贏過嘅死敵熱刺，斯維力撐主勝。

（now 621周日凌晨零時30分直播）

兩支北倫敦死敵積累百年仇怨，絕對係老死不相往來，無論大家排名相差幾遠，每次碰頭都充滿火藥味。阿仙奴早前喺聯賽連和愛華頓、李斯特城及曼城，更喺歐聯輸畀多蒙特，主帥雲格將「大眼仔」放喺邊路，搞到呢位擅於中路畀靚直線嘅德國球星無用武之地，亂點鴛鴦備受批評。好彩「教授」從善如流，上仗對維拉解放「大眼仔」，佢即時生晒入波兼助攻大勝一場，連新加盟嘅前鋒韋碧克亦成功開齋，重拾以往行雲流水嘅進攻。
熱刺聯賽3場不勝

另一邊廂，熱刺喺聯賽已三戰不勝，打和新特蘭及不敵西布朗都離晒大譜，雖然周中英聯盃反勝森林晉級，但對方偏弱不足為據。況且熱刺近年作客阿仙奴唔多老利，近四次去酋長球場嘅正式比賽都敗北。相反，阿仙奴有兩大守將梅迪薩卡及基蘭基比斯趕及復出，有力擊退熱刺，主勝有1.63倍咪嫌少呀。