漢堡主場遇弱開齋冇蘭度

猪拉多纳

本周德甲壓軸戲漢堡主場鬥法蘭克福，漢堡開咧至今不但未贏過，仲一球都入唔到，球隊上下都好心急，今晚喜逢實力較次兼防線傷兵成災嘅法蘭克福，相信係開齋黃金機會，漢堡小讓平半，黑柴決心追多一次。

（有線61及64台周日晚11時30分直播）

漢堡今季大灑金錢圖振作，但開季後成績依然低落，原因係球員同教練史隆卡之間出現矛盾，球員唔肯為佢賣命，愈踢愈冇鬥心。漢堡新體育總監比亞斯多化挑通眼眉，毅然決定喺只踢咗3輪即炒史隆卡，由Ｕ23教練辛巴亞頂上，佢拉手後分別主場0比0打和班霸拜仁，作客0比1僅負表現神勇嘅慕遜加柏，球隊喺鬥志同防守方面表現都大有改善，但由於對手太強，令佢哋主力攻擊手拉蘇加、賀治比同尼古拉梅拿都要經常參與防守，今晚難得返主場遇上次一皮對手，辛巴亞賽前操練針對加強埋門把握，對爭取入波同開齋充滿決心。
法蘭克福防線折3主力

法蘭克福今夏星散令整體實力滑落，雖然搵到名帥舒哈夫出山執教，不過變動太大仲要時間執，出名玩喪攻嘅舒哈夫頻頻同對手駁火，球隊近4場不勝共失7球，證明行錯方向，今晚作客漢堡前更不斷接到壞消息，除正選左閘迪查柏喺第4輪對史浩克傷出要長抖外，領袖級門將奇雲查普上仗對緬恩斯喺比賽末段左腳踝重創要做手術，球隊得番副選嘅韋爾特華森一個門將，佢上季全季只喺德甲上陣過廿幾分鐘，搞到舒哈夫要臨時臨急簽入無班落嘅過氣門神希迪布蘭做副手，最後一關穩陣程度大減，連主力中堅森拜奴上仗亦受傷，今晚落場情況唔樂觀，法蘭克福防線驟失3大主力，漢堡今仗有機可乘。