祖雲達斯贏質素食住羅馬

猪拉多纳

今夜意甲榜首激戰，祖雲達斯硬撼同樣5戰全勝嘅羅馬肯定打崩頭，小弟一定力撐「老婦人」，喺自己地頭踢走「首都狼」，獨自佔領榜首。

（TVB301周一凌晨0:00直播）

祖雲達斯季初連贏走勢，隨住上周中歐聯0:1輸畀馬體會而告終，「老婦人」跌一跤，但會好快爬起身重整旗鼓，皆因佢哋攻守都掂，計埋歐聯，成隊入咗12球，一半嚟自泰維斯，可見呢個阿根廷射手極其重要，智利中場維達爾亦有兩球進帳，南美兵主宰進攻命脈。保方保方，繼續保住後方保住意甲清白之身，再者派路亦告傷愈可隨時候命。

有老將亦有壯兵，京士利高文同羅拔圖佩雷拉，有膽識同技術，未來靠晒呢班90後，儘管巴沙利同維羅納借將羅姆路因傷缺陣，艾華路莫拉達亦未必踢到，但無問題囉，「老婦人」勝在板櫈深度夠，上季兩循環分別贏3:0及1:0。

羅馬自2010年後作客都靈未贏過，仲失咗11球，貝拿迪亞過檔拜仁、李安度卡斯坦養傷，依家靠文奴拿斯同恩加麥比華頂住，暫時聯賽只失1球，但今場防線備受考驗。進攻方面，本地薑迪斯度同費奧倫斯漸上位，偶爾更有神來之筆，「王子」托迪亦寶刀未老，加上謝雲奴嘅突破力，「首都狼」有多個搶分點，不過迪羅斯、史杜特文同巴沙列堤等打咗柴，整體實力似乎唔及「老婦人」咁平均。

值得一提係，兩隊左後衞艾殊利高爾及艾拉，由英超轉戰意甲後首次同場較量。