暫時放下紛爭捧阿根廷場

猪拉多纳

雖然近期體育新聞並非港人最關心嘅話題，Peter對政治問題比較愚蠢，但本地足球仍有一件盛事值得留意，就係香港足總成立100周年紀念賽。

本人自5歲起睇波後，有幸睇咗當中65年，眼見唔少朝代更替，從昔日「香港之寶」姚卓然，到依家U16神童林樂勤，而中間仲有黃文偉、陳鴻平、葉尚華、尹志強、山度士、譚兆偉、歐偉倫，再到炙手可熱嘅門神「英雄輝」葉鴻輝，佢哋都係Peter嘅球員或好朋友，亦見證住香港足球發展。

難得香港足總於成立百周年嘅大日子，重金邀請球星如雲嘅阿根廷國家隊，於下周二出戰香港代表隊，若然人民對香港有股熱血嘅話，呢場波實在不容錯過，因為身處動盪社會中，無論你企喺乜嘢立場，都可透過睇場精彩比賽藉此減壓，趁現時仲有飛賣，忘卻一切睇場好波，讓繃緊嘅神經放鬆吓喇！
強大德國可勝波蘭

講番本周歐國盃外圍賽，唯一較有把握嘅就係D組德國作客波蘭，強大嘅「日耳曼兵團」乘住勇奪世界盃嘅餘威，就算對方有神鋒羅拔利雲度夫斯基壓陣，但Peter認為德國今仗始終贏面較高。
金句：無論你站在何方，睇阿根廷係減壓良方