比利時強襲波斯尼亞

猪拉多纳

上仗炒安道爾留一手

今晚歐國盃外圍賽重頭大戰，非B組波斯尼亞主場火併「歐洲紅魔」比利時莫屬，後者雖有王牌夏薩特上陣成疑，但以「新魔獸」盧卡古、奇雲迪布尼及梅頓斯組成嘅鋒線，火力一樣咁猛，撞正波斯尼亞中後場傷兵滿營，「歐洲紅魔」仲唔乘住大勝餘威再斬多四両咩？比利時今仗小讓平半，斯維力撐上盤。

（有線64及203台周二凌晨2時45分直播）

波斯尼亞坐擁英、德、意聯賽三大進攻好手迪斯高、伊比斯域及比真歷，可惜上仗個個都忘帶射門鞋，最終圍攻之下遭威爾斯悶和0比0，兩場外圍賽僅得1分，睇得出佢哋狀態唔多弗喎。最弊係波斯尼亞有守將史柏希斯、畢卡錫及中場沙利荷域先後因傷退隊，冇咗呢班不可或缺嘅主力，加上焗用經驗太少嘅比錫出任防中，令本身唔多穩陣嘅防線更加牙煙。
波國中後場唔齊腳點頂

另一邊廂，比利時同樣有「金童」夏薩特飽受傷患困擾，未知能否趕及披甲，好彩主帥韋莫斯麾下大把籌碼，除咗上周大炒安道爾6蛋中各有士哥嘅奇雲迪布尼、梅頓斯及奧歷治之外，韋帥上仗仲特登收起「新魔獸」盧卡古、費蘭尼、迪比利等猛將，前兩者只係後備入場踢咗一陣，甚至半場冇耐換走埋隊長兼中堅高柏尼，擺明留力應付今仗，依家成班養精蓄銳，挾住啱啱大勝氣勢，就算作客都唔赦傷兵成籮嘅波斯尼亞，「歐洲紅魔」小讓平半值博。