放下政見入場齊心撐港隊

猪拉多纳

適逢香港足總成立百周年嘅大日子，日前更公布廿二名神奇頂級超卓嘅本地昔日球星進入名人堂，喺度要特別多謝足總主席梁孔德先生，策劃今次「世紀球星選舉」，表揚一班曾為本地波作出貢獻嘅健兒，因為世界各地任何隊制運動，都有設立呢類名人堂向昔日名宿致敬。今晚大家記得入場睇重頭戲──阿根廷對香港代表隊。難得邀請到當時得令嘅世盃亞軍造訪，為足總成立百周年紀念賀壽，無論「潘帕斯雄鷹」夫添與否、球王美斯出場幾耐，都係一支實力強橫嘅國家隊，由於體育係中立，就算你哋喺政治上企喺唔同立場，如果各位熱愛香港的話，都一於入場欣賞呢場有今生、冇來世嘅賽事喇！
丹麥硬淨頂住葡萄牙

至於今輪歐國盃外圍賽，Peter就睇中I組丹麥主場火併葡萄牙，大家唔好因為葡萄牙有巨星C朗壓陣而盲目追捧，因為佢哋整體合作及防守都麻麻，隨時畀球風硬朗嘅丹麥剋住，而F組希臘一向係地頭蟲，相信可藉地利擊敗北愛爾蘭，打開勝利之門。