多蒙特做好戲炒起聖保利

猪拉多纳

老細開聲攬你，點都要做番齣好戲畀人睇啦，啱唔啱先？多蒙特今季德甲戰績衰到貼地，連日嚟有傳教練高普就快冇得撈，不過會方尋日講明會撐高普，為咗喺硬撼拜仁前振軍心，今晚德盃次圈實搵聖保利祭旗，捧1.60倍「讓客」！

（明珠台周三凌晨3:30直播）
蜜蜂高層開聲撐高普

歐聯同德甲表現差天共地嘅多蒙特，連埋上周六不敵漢諾威場波已經錄得聯賽4連敗，球會行政總裁華斯基尋日透過官網強調，會方對高普有絕對嘅信任，粉碎炒教練嘅傳聞。嚟緊禮拜日，多蒙特會造訪拜仁合演「德國打吡」，高普賽前話希望大勝一仗，盡快打起士氣迎接拜仁，仲嗌晒口號咁講：「我哋會繼續搏命！」聽佢咁講，今鋪即使對住聖保利都應該唔會放軟手腳。

聖保利家陣喺德乙排榜下游，上場聯賽仲喺主場淨吞卡爾斯魯厄4隻光蛋添，有幾多料大家心照。最濕滯嘅，佢哋今仗有丹尼爾貝巴拿、杜蘭特同侯斯頓保3位守將倦勤，睇怕都係聽炒。