開季保持不敗！阿德萊德聯「客W」抵捧

猪拉多纳

墨爾本城今季雖然有星級戰將韋拿以外借身份加盟，但係仲未打開勝利之門。最大鑊係前「狂牛射手」韋拿無厘頭突然決定，由客串10場減到客串4場，即係踢埋呢場主場對阿德萊德聯就離隊！墨爾本城近況已經唔掂，仲要有猛將出走，絕對捧唔過，一於撐2.95倍嘅客W！

(有線64、203周五下午4:40直播)
韋拿提早告別墨爾本城

今季轉投美職新球隊紐約城嘅韋拿，因為球隊要下季先正式登陸美職，所以就先以外借形式加盟墨爾本城，務求踢正式比賽Keep住狀態。本來預期呢位32歲前鋒會客串10場澳職比賽，下年1月先會返美國同球會報到，但係佢日前突然決定踢埋對阿德萊德聯場波，未到11月就會離隊。韋拿突然閃人嘅原因冇人知，球會亦唔願透露，搞到成班波一頭霧水，軍心大亂，就算喺主場出擊都肯定惡唔出樣，想喺聯賽開齋都幾難。

另邊廂，阿德萊德聯連埋澳總開季6戰不敗仲入咗11球，鋒力強橫。一對箭頭沙治奧施里奧及迪捷特狀態大勇，今戰對住內部亂晒坑嘅墨爾本城，相信阿軍要全取3分真係易過借火！