阿仙奴好運陸續有尼

猪拉多纳

(六)32 阿仙奴 Vs 般尼

正所謂好波不如好運，阿仙奴今晚英超主場迎戰般尼，前者雖有基奧特、奧斯爾、奧斯賓拿及迪保治等成籮傷兵，但命不該絕，先喺歐聯完場前極速入兩粒反勝安德列治死裏逃生，上仗聯賽作客新特蘭，又多得對方中堅布朗及門將文路尼連番犯錯「送禮」輕取兩粒，總算度過危機重上正軌。近三仗轟入三粒兼交出一次助攻嘅阿歷斯山齊士，真係弗到漏油，連續兩個月當選兵工廠最佳球員，其永不認輸嘅鬥志更加激勵到身邊隊友。

般尼質素所限，主力射手禾基斯遲遲未好番，齋靠防守及拚勁蛇都死喇，難怪今季升班後十場正式賽事未嘗一勝，作客去到酋長球場凶多吉少，阿仙奴仲有中場韋舒亞刑滿及前鋒耶耶辛洛高傷愈候命，要淨勝兩粒冇難度，直取讓球主勝。

（now 622周六晚11時直播）