紅軍圍捕喜鵲「大」陣仗

猪拉多纳

紐卡素上仗英聯盃16強作客砌低曼城，成班波士氣爆燈，今晚回師主場迎戰利物浦，肯定心雄搶攻，不過「紅軍」鋒力亦有番咁上下，兩軍互片，捧1.68倍入球大好過揀盤啦！（now621台周六晚8:45直播）
巴神開齋 史獨繼續抖

紐卡素開季表現失色，領隊柏杜更一度面臨下台壓力，好在班波及時復勇，連續作客砌低曼城同熱刺，錄得久違嘅3連勝，今晚回師主場，「喜鵲」當然想食住個勢搶多3分啦！雖然射手柏比斯施斯打柴，但前鋒艾約斯佩雷斯、中場穆沙施素高最近接連着火，「紅軍」條豆腐防線唔易守得住囉！

同樣殺入英聯盃8強嘅利物浦，領隊羅渣士話會畀射手史杜列治繼續休息，「史獨」亦承認自己嘅家族長輩都勁易傷，「玻璃體質」似乎係同遺傳有關。好在，佢個隊友巴洛迪利上仗終於打破入球荒，配合要為新約搏命嘅隊長謝拉特，有機會擔正支援巴神嘅波連尼踢爭氣波，贏唔贏到未知，但入波就應該唔會少喇！