頹爆維拉難抗熱刺

猪拉多纳

(日)30 阿士東維拉 Vs 熱刺

若然對住曳爆嘅昆士柏流浪都輸得，咁對住實力再高幾班嘅熱刺，唔輸嘅機會又會係幾多？相信大家都心中有數。「沒有最頹，只有更頹」嘅阿士東維拉將喺主場迎戰熱刺，冇太多主力缺陣嘅熱刺今場唔贏對唔住自己呀，1.92倍嘅客勝梗係捧得過！

（now 621周一凌晨零時直播）
熱刺卡尼艾迪巴約弗

阿士東維拉喺英超錄得5連敗，死穴係弱得恐怖嘅攻力，踢咗9場聯賽先入得4球，仲少過包尾大幡般尼，真係醜上加醜﹗雖然都知道呢隊波一向都守強攻弱，但都唔使入得咁少啩？入到波先攞到分甚至贏埋嘛﹗其實佢哋原本有個一級射手賓迪基，可惜佢重傷完後一直都未去番最佳狀態，艾邦拉荷、安祖斯韋文等前鋒又唔爭氣，個個都唔識入波，中場主力戴爾夫又要到下個月先出得番，唔好話入波呀，結果維拉連攻勢都組織唔到呀！

熱刺陣中冇乜傷兵問題，係得基爾獲加同賓達納缺陣，基斯甸艾歷臣、拉美拿、查迪尼、艾迪巴約等主將均可悉數上陣，仲有個新星哈利卡尼等緊上位，見到卡尼呢排咁弗，艾迪巴約都不敢怠慢，上場英超對紐卡素終於都重拾射門鞋，取得第2個聯賽入球，今場熱刺作客都唔怕追！