曼城昆士柏大駁火

猪拉多纳

(六)54 昆士柏流浪 Vs 曼城

曼城喺歐聯又輸一場，出線希望愈來愈渺茫，因此英超戰線更加不容有失，今晚聯賽作客尾二嘅昆士柏流浪（QPR），曼城正好把握機會爭取大勝，重振士氣。至於QPR亦冇嘢再輸，近排已豁出去同對手鬥攻，曼城防線麻麻，難保不失，最好揀入球大。

（now 621周日凌晨1時30分直播）

曼城有兩人被逐下，不敵莫斯科中央陸軍，只能怪自己紀律差，其中一位紅牌主角耶耶托尼亦作出道歉，吸取教訓後，應會恢復冷靜，發揮正常水平。以阿古路等人嘅級數，要攻陷QPR大門並唔難。昆士柏流浪開始有降班危機，近期踢法愈來愈進取搶分，上仗鬥車路士，亦有波入，前鋒查理柯士甸近兩仗轟入3球，勢必成曼城心腹大患，即使贏唔到曼城，都應該可以破蛋。