熱刺攻城上盤抵玩

猪拉多纳

熱刺今周喺主場迎戰史篤城，雖然有艾迪巴約同艾朗連儂一對主力因為有輕傷而上陣成疑，但係後備殺手哈利卡尼近3場都有波入，Fit到識飛咁，史篤城見到佢都有排頭痕。熱刺今戰讓半一，1.84倍嘅「上盤」捧得過！

（now621台周日晚上9:30直播）
小將哈利卡尼Fit爆

熱刺射手艾迪巴約同快翼艾朗連儂因為大腿有傷，冇踢周中作客卓普利斯嘅歐霸盃比賽，兩人將會喺今戰賽前決定出唔出得。不過，就算佢兩個真係唔踢得，熱刺都仲有哈利卡尼同安祖斯唐辛可以頂替。講起哈利卡尼，呢位小將真係Fit爆，近3場都有士哥，而且上周聯賽對阿士東維拉，就係靠佢入波先可以反勝對手。

另邊廂嘅史篤城近況認真一般，連埋盃賽佢哋已經連續3場不勝，今晚仲要作客白鹿徑，睇怕呢3分都凍過水！
（日）26 熱刺 Vs 史篤城