「格仔B隊」球星釀罷踢 阿根廷野獸回歸搶W

猪拉多纳

阿根廷今晚喺倫敦同克羅地亞踢熱身賽，獲重召嘅泰維斯成為最大焦點。呢位祖雲達斯前鋒3年後再次入選，梗係唔會揸流攤啦！克羅地亞今戰會為對意大利嘅歐國盃外圍賽大戰試陣，但講明派B隊上陣搞到有球員作反，軍心不穩梗係撐1.70倍「讓主」。

（開賽時間︰周四凌晨3:45）
克羅地亞留力鬥意大利 派B隊兵古高作反

泰維斯呢幾年狀態其實好Fit，但前任領隊沙貝拉一向唔Like佢，所以自2011年上任後，「野獸」就一直同國家隊無緣。不過沙貝拉喺今夏世盃後卸任，由馬天奴接手，泰維斯終獲得重召，有望今仗上陣。除咗佢之外，馬天奴今次揀蟀同之前冇乜大分別，今仗亦會排出最強陣容，實力之強非「格仔兵」頂得住。

雖然克羅地亞一班主力好似拿傑迪錫、莫迪歷同文迪蘇傑都有入選，不過領隊尼高高華就玩嘢，講明會用B隊搭部分大國腳上陣，莫迪歷、拿傑迪錫、洛夫雲同文迪蘇傑等主將，依家仲留喺薩格勒布備戰意大利。最慘入選B隊嘅中場古高作反，公開插尼高高華：「我嘅入波同助攻數字勁過好多入選嘅球員！」保加利亞傳媒話呢位索菲亞中央陸軍球星可能會罷踢，克羅地亞呢場根本冇心玩，點撐得落？