德國頂唔住狂牛

猪拉多纳

紐亞 保定打柴兼跌Watt

德國自從拎咗世盃冠軍後霸氣盡失，好似洩咗氣嘅氣球咁，近5場只贏得兩場。「日耳曼兵團」今晚作客西班牙踢熱身賽，佢哋過去3次交手都輸波之餘，今場仲有門神紐亞同中堅謝路美保定養傷，殘陣對住「狂牛兵團」，梗係捧2.02倍主勝啦！

（開賽時間︰周三凌晨3:45）

德國喺今年7月登上世盃王者寶座，但個位都未坐得暖，9月就喺主場畀世盃亞軍阿根廷復仇成功，之後表現都唔係幾掂，世盃後5場波只贏得兩場。佢哋喺上場歐國盃外圍賽主場對直布羅陀，雖然以4球大勝，但全場好多機會都把握唔到，神射手高路斯退出國家隊後，前線把握力不足問題暴露晒出嚟。今仗佢哋後防仲有金手套門神紐亞同謝路美保定打柴，冇前又冇後，點同「狂牛兵團」鬥？
西班牙射手艾卡沙 5場勁入3球

雖然西班牙世盃表現勁失色，仲有沙維同沙比艾朗素兩名中場大將告別國家隊，但接班嘅佐治高基絕對唔嘢小。前鋒方面，華倫西亞射手柏高艾卡沙為國家隊上陣5次已經入咗3球，成為「當紅炸子雞」，年輕力壯嘅西班牙對住霸氣盡失嘅德國，未開波都高下立見啦！