墨爾本勝利主W依「獅」執

猪拉多纳

墨爾本勝利今日喺澳職主場迎戰布里斯班獅吼，有阿爾巴尼亞前鋒貝利沙首次倒戈舊主，賽前佢講明雖然獅吼陣中有一大班朋友，不過呢場波對勝利極為重要，所以幾Friend都冇情講，承諾會出盡全力爭勝，咁有鬥志一於捧1.78倍主W！

（有線64及203周五下午4:40直播）
布里斯班獅吼勢頹

貝利沙今季加盟令勝利火力大幅提升，佢暫以5球高踞聯賽射手榜首唔在講，勝利踢咗6輪攻入14球，更係澳職目前鋒力最強嘅一隊。佢哋今場有巴巴路西斯、米利根同丹尼爾佐治夫斯基等猛將踢完國際賽回歸，加上挾主場3連勝強勢出征，貝利沙今場話要贏波唔係得個講字！

另邊廂衞冕總冠軍獅吼出閘脫腳，澳足總盃連澳職開季5連敗，雖然射手軒歷基安達迪上輪聯賽失驚無神大爆發，連中三元為獅吼敲響聯賽勝鼓，但值得留意嘅係，嗰場對手只係表現比佢哋更差嘅紐卡素噴射機，就算大勝都唔夠說服力，今場造訪氣勢如虹嘅墨爾本勝利，睇怕難以全身而退。