多蒙特hea踢殘兵偷到雞

猪拉多纳

阿仙奴於D組主場迎戰德甲多蒙特，兵工廠賽前鬧出大笑話，球會因為估唔到前鋒基奧特可提前復出，所以遞交分組賽名單時冇幫佢報名，搞到佢喺最後兩輪賽事都不能上陣，好彩多蒙特已穩奪出線權，主力馬高列奧斯又剛於聯賽重創長抖，平手盤照捧阿仙奴。

（有線61及201台周四凌晨3時45分直播）
烏龍阿仙奴賴低基奧特

阿仙奴現以五分領先安德列治，由於對賽佔優，阿仙奴和波都可出線，就算阿仙奴輸波，另一邊廂安德列治同加拉塔沙雷打和，阿仙奴一樣可晉級，咁係咪代表阿仙奴冇必要求勝？波童認為啱啱相反，阿仙奴自上輪分組賽喺領先三球嘅情況下被追和，然後聯賽接連輸畀史雲斯及曼聯，球隊上下已被傳媒及球迷批評得體無完膚，實在有必要以一場勝仗去振奮士氣。

雖然阿仙奴陣容不整，除基奧特冇報名唔符合上陣資格，奧斯爾、哥斯尼續養傷，門將施捷斯尼、中場韋舒亞、禾確特亦上陣成疑；不過多蒙特情況亦唔多好，當家球星馬高列奧斯上仗受傷要抖到明年一月，而且佢哋現排德甲十六位，聯賽成績仲衰過阿仙奴，既然歐聯已經穩奪出線席位，為免再有主力受傷影響聯賽演出，就算唔出副選都一定就住嚟踢，平手盤一於捧阿仙奴。