寸王報仇鍊車撞散新特蘭

猪拉多纳

(六)65 新特蘭 Vs 車路士

球迷之間有一個傳說：「莫連奴第二季好難應付！」大家根據以往數據，由首次執教車路士到國際米蘭，跟住皇家馬德里，第二季必然攞到聯賽冠軍，仲會創造某些紀錄，原因係佢死唔認輸性格，尤其對住佢嘅前度，例如舊將、舊部下或者係執教球會之前嘅領隊教練，佢一定會贏，好似周中對住迪馬堤奧，莫連奴領軍嘅車仔就炒足史浩克五蛋，周日凌晨對住上季破佢主場不敗紀錄嘅新特蘭主帥普耶，肯定有仇報仇，炒番兩粒係基本要求。

（now 621周日凌晨1時30分直播）
普耶大口氣想贏多鋪

上季莫連奴保持七十七場英超主場不敗紀錄，被普耶帶領嘅新特蘭於四月打破，如今車仔跨季二十一場不敗，今次作客光明球場再遇上普耶，賽前呢名車仔舊將竟然出口術，話世事無絕對：「我相信車路士今季目標係贏所有錦標，唔係保持不敗，所以過程之中輸一、兩場，佢哋唔會介意。既然我哋上季做過呢個創舉，今場一樣有機會，係咪先？」

打口水戰係莫連奴強項，普耶似乎唔記得咗，「寸王」係一個有仇報仇之人，而且最鍾意用成績證明自己有料過其他人，好似周中場歐聯，迪馬堤奧帶車仔攞過歐聯咩，佢就作客炒你五球；依家普耶舊事重提，講番上季點打破車仔不敗紀錄，只會激發莫連奴，而且莫帥手上個個球員當弗，炒你三、四球易過借火，呢場最佳投X係讓球客勝。