悉尼打吡流浪者回勇抵捧

猪拉多纳

「亞洲之王」反擊戰要上演啦！上月喺亞冠盃封王嘅西悉尼流浪者，返到澳職竟然一場未贏過排包尾，呢個都算係球壇一大奇景。不過西流者今日「悉尼打吡」主場迎戰宿敵FC悉尼，逐漸上力嘅主隊係時候做番場好戲，王牌前鋒杜米祖歷上場開齋後信心十足，有望擊敗主將缺陣嘅FC悉尼，主勝值得支持。

（有線64及203周六下午4:30直播）

主場未輸過

西悉尼流浪者季初將精力放晒喺亞冠盃度，雖然最終成功封王，但澳職就踢到一塌糊塗，不過睇得出呢支亞洲盟主已經逐漸回復狀態，聯賽4連敗後最近2場比賽都和波止血，前鋒杜米祖歷上仗對噴射機更加拎到今季澳職第1個士哥，對佢同成隊波嘅信心都有好大鼓舞作用，最重要係佢哋近12場主場賽事都未輸過，今場有力憑地利打開勝利之門。

作客嘅FC悉尼今季一場波都未輸過，不過塞爾維亞中場靈魂迪米查捷域今場停賽，嚴重影響隊波嘅攻守實力，而且主力射手哥利加美路亦因嚴重膝傷提早收咧，FC悉尼要重演季初3:2贏西悉尼流浪者嗰幕實在唔容易，今場撐「主勝」最穩陣。
頂占筍盤：西悉尼流浪者（主勝）