福趣2班難佔甜頭

不死鸟

告東尼馬房去季出咗「夢幻組合」和「締造美麗」兩顆新星，均屬來自澳紐嘅自購馬，所謂一不離二、二不離三，K374「福趣」會唔會就係這個「三」呢？這馬與「金津好」同父同年份出生，出賽歷程也很相似，都係兩歲出道兼且贏過，踏入3歲逐漸「升呢」，「福趣」於沙丘園取得城市馬場首捷，路程為1200米，來港前一仗走出維省，南下漆咸於1450米表列賽再添勝仗。
睇番同馬房「漂亮第一」，亦曾於南澳漆咸馬場勝出3歲馬表列賽，另加一場在萬富圍的三級賽輸少許得亞軍，來港評90分，結果熱身一仗後，再出已有本事於二級賽跟「好日子」串Q，以牠做指標，「福趣」評82分談不上有賺，又不致於吃虧。明知Thorn Park子嗣以早熟為主，「福趣」來到目前4歲，最值得關注嘅係，究竟還有幾多進步？以審慎態度評估，未必可像「夢幻組合」和「締造美麗」般發光發熱，居2班很可能要等機會，肯立心減掉兩分落3班，至少保證有實力爭勝，視乎幕後心態會否自視過高，來港前贏開1200、1400米都反映得很透徹，應是其最佳射程所在。