前列大戰錘仔扑鵝

猪拉多纳

今晚有場英超前列大戰，「錘仔幫」韋斯咸主場迎戰「天鵝」史雲斯，唔係講笑，踢咗14場聯賽，「錘仔幫」有24分排喺第5位，「天鵝」就以22分排第7，仲唔係前列大戰？不過史雲斯係地頭蟲，作客冇料到，近4作客輸咗3場，韋斯咸讓平半，上盤可以放心捧場。

（now 621周日晚9時30分直播）

韋斯咸「玻璃人」安祖卡路爾傷愈復出踢咗幾場波，但都未開齋，領隊艾拿戴斯（大Sam）日前突然承認上年曾對尚未加盟史雲斯嘅射手韋菲特邦尼有興趣，但最尾都為咗收購卡路爾而放棄佢，大Sam賽前特登講啲咁嘅說話，擺明係激將法。其實「錘仔幫」早前着晒火嘅前鋒迪亞法沙高傷愈，大Sam有沙高呢張王牌在手，而且球隊近5次主場對住史雲斯錄得4勝1和佳績，韋斯咸可謂勝券在握。
維拉反彈勢破李城

稍後時間仲有場阿士東維拉主場對李斯特城，維拉上場贏水晶宮，取得自九月中以來首場勝仗，士氣大振，反觀李斯特城近7場聯賽輸咗6場，已經跌到榜尾，主帥皮雅臣更同球迷爆發罵戰，羞家到痹，今場又有守將韋斯摩根停賽，維拉讓平半，捧上盤！

（now 621周一凌晨零時直播）