里昂火力猛「客」窒朗斯

猪拉多纳

法總 21:15 （日）9 朗斯 Vs 里昂

周日法總第9圈，朗斯「掛名」主場硬撼里昂，1.62倍客勝制得過。朗斯個主場由於要進行翻新，作為2016年歐國盃舉行場地，搞到今季慘成無「主」孤魂，無論聯賽定盃賽都冇晒主場優勢，即使佢哋季初試過喺聯賽爆冷擊敗里昂，但當時對手分心踢歐霸盃至成功偷雞，講真今場再爆冷嘅機會唔大。

（TVB301周日晚9:15直播）
里昂射手拿卡錫迪大勇

相反里昂緣盡今屆歐霸盃之後，專注本地賽事踢得唔錯，現時喺法甲緊守次席之餘，更係進攻火力最強嗰隊，其中前鋒拿卡錫迪狀態勁弗，近4場聯賽勁轟7球，壓過基格納同伊巴謙莫域高踞射手榜首位，今場有佢孭飛數胡，要喺法定時間搞掂朗斯話咁易啦！