勁有利實力有保留

不死鸟

來到上季未出賽自購馬系列的終結篇，K412「勁有利」乃上季拍賣馬狀元「大有利」同主新貨，此匹3歲愛爾蘭馬今年4月響高崗馬場上陣一次，角逐1700米處女馬賽，結果以15個馬位之遙大勝對手，從網上文字報告得知，馬兒展步遲緩，但隨即跟上前列，末段如入無人之境，無驚無險大熱勝出，而2、3名都相距4個半馬位，仄番亞軍再出依然贏唔到，季軍再出跑4場得1贏3負，說穿了，係對手水皮�s！
血緣方面，其父Danetime乃「丹山」後代曾3勝1200米，另於七月盃等兩項一級賽得季軍，99年開始配種，首匹來港子嗣「叻蝦王」由愛倫引入，第二季由沈集成接手，贏過兩場1班賽，現役同系馬有「浚鋒天河」和「再來風」，實力則只值3班。其母跑過兩次無功，產下5胎出賽，僅得兩駒獲勝，整體血統只屬一般，加上來港前只在低水準賽事大勝，「勁有利」來港評76分，對其實力暫有所保留，還好暑期一早開操，近期更展開快跳工序，證明適應得好，三兩個回合上陣便可問前程。