馬體會火力全開大炒格

猪拉多纳

西甲「三哥」馬德里體育會今晚會喺主場迎戰CF格蘭納達，「床單軍團」今場差唔多可以「夫添」出擊，後備更有個「翻生王子」費蘭度托利斯，做緊包尾大幡嘅格蘭納達有乜可能阻到佢哋吖，1.54倍讓球主勝要趁熱食！

（now 632周一凌晨零時直播）

馬體會上場西班牙盃對皇馬有當家射手文迪蘇傑發燒缺陣，結果造就「愛回家」嘅費托梅開二度做英雄。見到「王子」表現咁sharp醒，文迪蘇傑又點敢鬆懈，梗係要快啲好番重奪正選位置；據西班牙《馬卡報》報道，文迪蘇傑同賽後都有少少唔舒服嘅基沙文已經復操，今場可以隨時候命，依家隊中只係得後衞安沙迪一名傷兵，主帥施蒙尼今勻遇上「幸福的煩惱」嘞！
格蘭納達傷兵成籮

榜尾嘅CF格蘭納達踢咗半季仍然冇復甦迹象，上場西班牙盃仲要畀西維爾大炒四蛋，球會高層忍無可忍，日前決定將教頭卡柏路斯落鑊，搵助教阿桂度暫代主帥一職。雖然足球比賽成日出現「新帥效應」，不過都要睇吓隊波同對手嘅實力差幾遠先得喎！格蘭納達傷兵滿營，前中後都有人缺陣，包括前鋒祖安哥度巴、中場桑卡路士佩雷斯同守將謝臣梅里路等，今場遇着要追分嘅馬體會，格蘭納達註定冇運行，「讓主」咪走雞！