嚴打失準拭目以待

不死鸟

日前馬會高層與一眾騎練分別舉行季前會議，正如馬房季前拜神一樣，年年如是似例行公事，相信一眾新舊騎師都心裡有數，今季新官上升，未知有無三把火，殺一儆百，仲話嚴打表現失準人馬，假若落實執行騎練有機會被罰的話，未知是罰人兼罰馬，還是人馬分開罰，大家不妨拭目以待。
作為騎師，條例一向有規管，陣上不小心策騎或未盡全力，輕則罰款停賽，重則釘牌都有份，類似個案並不多，而騎師牽涉造馬及非法勾當影響賽果，肯定會被撤銷牌照，雖然如此，在金錢利益引誘下，亦有個別騎師以身試法，結果在其策騎生涯上蒙上污點，甚至要從此掛靴。
騎師陣上不小心策騎，主因求勝心切，心急取位干擾其他馬匹，受罰情有可原，但假若為?侶做遮擋而影響其他對手，造出危險動作就罪加一等。至於未盡全力，表面比較難捉，騎師在馬背上要有明顯動作，或沿途取位上明顯不當才可入罪，反而違反馬性跑法，應放而留或應留而放，事後解畫好易自圓其說，小組亦無符。