紅軍拖肥跳士哥「開心舞」

猪拉多纳

now621 周日凌晨1:30直播

今晚「默西賽德郡」愛華頓主場對利物浦，玩1.9倍入球大最實際。雖然愛華頓近排唔多識入波，但領隊馬天尼斯出名鍾意喪攻，加上紅軍領隊羅渣士改口考慮畀史杜列治打正選，相信佢嘅「開心舞」會帶動隊友踢得更進取，整場入球騷大家歎！

（now621台周日凌晨1:30直播）
「史獨」操練弗擔正

或者因為門將侯活養傷，最近愛華頓踢得比較謹慎，連和4場後，上星期終作客以1:0砌低水晶宮贏波，期間5場更全部開細。加上新借用嘅熱刺翼鋒艾朗連儂，因不滿被賣豬仔，轉會後影親相都黑面，令人擔心佢哋繼續撻唔着。

不過拖肥領隊馬天尼斯向來鍾意玩進攻足球，佢上任後3次領軍對利物浦，只得今季首循環作客踢成1:1開細，上季主場同利物浦踢成3:3，作客淨吞4蛋同樣開大。

另一方面，利物浦射手史杜列治傷愈後連續2場後備落場，原本領隊羅渣士話，冇預佢喺打吡戰打正選，但聽聞佢操練期間勁弗，賽前羅渣士已放風唔排除畀「史獨」擔正，今場隨時又有波入，佢近排仲喺更衣室教跳「開心舞」，氹到隊友鬼咁開心。加埋中場菲臘比古天奴落實續約至2020年，又有New Balance送上6年總值3億鎊（約35.6億港元）贊助費，咁多利好消息，相信紅軍已捱過低潮，開入球騷慶祝吓最好！