o靚焜，冠軍球隊所欲也！

猪拉多纳

東方於今季港超聯表現強勢，先聲奪人勇奪銀牌，除咗有賴高層醒目簽入葉鴻輝、李志豪、基藍馬、美路史拿域等華洋好手外，Peter認為該隊有位仁兄可奪Come Back Player Of The Year獎，中文即係鹹魚翻生球員獎，佢就係羅志焜。呢位翼鋒出身個子矮小嘅老將，今季出任右閘或串演左閘，唔只踢得中規中矩咁簡單，絕對係「大東方」陣中不可或缺嘅本土球員，佢無論喺腦筋上、靈活上及攻守方面都很出色。Peter素來最鍾意「o靚焜」呢類唔會犯腦筋上錯誤嘅有腦球員，就算面對高佬都好少蝕章，呢種實而不華嘅工兵型綠葉，永遠係冠軍球隊不可缺少嘅。
紐卡素主場可破城

今晚英超紐卡素主場對史篤城（now 621周日晚10時05分直播），乃係主帥卡華被正式確定執教到季尾後，首次喺主場領軍嘅賽事，Peter認為佢哋贏波機會高唱入雲。至於較早時間開波嘅下游大戰般尼主場對西布朗（now 621周日晚8時直播），屬於困獸鬥格局，應該和味濃。
金句：華麗登場+翻生鹹魚=冠軍材料