狐狸偷雞好時機

猪拉多纳

阿仙奴內部一頭煙

剛於北倫敦打吡輸波嘅阿仙奴，今晚英超快車返主場迎戰「狐狸」李斯特城，中場核心「大眼仔」奧斯爾仲唔知衰，賽前被影到豪購食水煙用嘅裝備，加上有傳主帥雲格同助手保特關係勁僵，軍心不穩下，「狐狸」決心死守隨時偷到「兵工廠」雞，讓球客勝值得一試。

(now 622周三凌晨3時45分直播)
奧斯爾犯禁斷正

「兵工廠」領隊雲格最憎自己弟子食煙，因為影響健康危及職業生涯，早前門將施捷斯尼喺更衣室煲煙斷正即被雪藏，估唔到啱啱傷愈復出嘅奧斯爾都係煙民，英國傳媒影到佢喺倫敦市中心入咗一間水煙店，出返嚟拎住食水煙用嘅煙管，之後放落車尾箱走人，你話佢唔係買嚟自用都冇人信喇，有指吸1粒鐘水煙嘅危害大過煲100支煙，「大眼仔」咁做實激到雲格出晒煙。

唔單止球員唔生性，連教練團都出現裂痕，原來雲格一直唔尊重助手兼前球隊名宿保特，對後者推薦買邊啲後衞加強防守全部Say No，之前阿仙奴作客戰勝曼城，傳媒大讚保特對提升防守貢獻良多，搞到「方丈」雲格唔多Happy，令內部矛盾升級。況且前幾日北倫敦打吡作客熱刺反勝為敗，5連勝斷纜，內憂外患下必定影響軍心。
舒華沙把關寶刀未老

其實包尾嘅李斯特城近況麻麻，並有門將卡斯柏舒米高及前鋒基斯活特倦勤，不過佢哋從車仔借來嘅42歲澳洲門神舒華沙寶刀未老，作客強敵勢必死守，撞正阿仙奴王牌阿歷斯山齊士剛傷愈未弗，要打破「狐狸」嘅鐵桶陣絕非易事，不妨冷敲有3.55倍嘅讓球客勝。