廠仔新兵包列斯達雞同鴨講

猪拉多纳

南美球員首度登陸英超，都要時間適應，冬季從維拉利爾轉投阿仙奴嘅基比爾包列斯達，就有呢個情況。領隊雲格話包列斯達嘅身體對抗性、比賽動力同防守都冇問題，唯一令人尷尬嘅係完全唔識英語！

使咗「兵工廠」1,100萬鎊，但呢位巴西中堅目前連「前」、「後」、「左」、「右」、「越位」、「球證」、「犯規」等簡單生字都唔識，又點能夠用英語同隊友溝通？但隨住雲格今場對米杜士堡打算畀梅迪薩卡休息，球迷依然有望睇到包列斯達處子登場。

足總盃係爆冷溫床，上圈已有多支英超列強出局，阿仙奴嘅衞冕之路，當然唔會易行。阿歷斯山齊士同艾朗藍斯近期又再加入傷兵行列，慶幸幾名小將比利連及高基連等，已經一再展示實力。繼周中快車擊敗李斯特城後留守酋長球場出戰，唔使舟車勞頓將係優勢。
米堡歐陸踢法英冠超班

米堡能夠作客淘汰曼城，聯賽5連勝上榜首，足證唔係吳下阿蒙。領隊卡蘭卡喺皇馬出任副手多年，足球理念亦同一貫英式領隊大為不同，球隊嘅歐陸踢法喺英冠確屬超班，來季有望重返英超。難怪被傳媒問及今場會唔會向恩師莫連奴請教時，卡蘭卡都一笑置之，其實又有邊個唔識阿仙奴嘅足球理念呢？

（now621、633台周一凌晨0:00直播）