維拉平手盤冇點李

猪拉多纳

兩支英超護級球隊維拉及李斯特城今晚喺足總盃碰頭，排包尾嘅「李城」護級水浸眼眉，領隊皮雅臣屢被高層照肺，更衣室士氣麻麻，反觀維拉剛送走「瘟神」林拔大快人心，今場係時候打爭氣波，平手抵博。

（now621及633台周日晚8:30直播）
威廉王子曾邀格蘭接手

林拔「眾望所歸」被炒，維拉擁躉近日紛紛喺社交網同討論區報喜。管理層目前委任史葛馬素同安迪馬素擔任看守領隊，雖然前車仔領隊、現任加納主帥格蘭，聲稱拒絕咗維拉「死忠」威廉王子提出嘅執教邀請，前英格蘭國腳蘇甘保又話有興趣接手，但維拉班主儂拿向來度縮，慳番筆畀兩位「馬素」坐正都唔奇，今戰將帥都要博表現戰意鮮明。

反觀「李城」目前係英超降班大熱，聯賽落後尾三嘅維拉5分，護級先係佢哋首要任務。「躁狂領隊」皮雅臣多次傳出被炒，早前對水晶宮向對方球員麥亞瑟叉頸，飽受壓力隨時影響今場備戰。

可能有人會覺得今場平手盤有啲鬼，但樂比認為全因維拉之前表現太差，操盤手未及調整所致，事實上維拉上圈對英冠般尼茅夫，對手亦係由受讓半球瘋狂落飛至平手，最終維拉亦贏波晉級，今場照捧可也！
樂比推介：阿士東維拉（平手）