誓炒普雷斯頓救命

猪拉多纳

魔王尹戈爾聞到鑊氣

英足盃16強值得捱眼瞓吼實，普雷斯頓喺主場越級挑戰曼聯，睇怕有好戲睇。最近紅魔被網民強力恥笑係長傳隊，領隊尹戈爾更加被格拉沙家族成員急Call照肺，佢老人家唔想被炒魷咁冇面，就要整場2.08倍「讓球客勝」威番次！

（now621及633台周二凌晨3:45直播）

普雷斯頓日前喺英甲作客以2:0砌低高車士打，連贏3場反彈，可惜前鋒保羅加拉查同碧福特因為傷病踢都未必夠態，搞到近排要用37歲嘅奇雲戴維斯，夥拍未徹底傷愈嘅首席射手祖加拿數胡，賽程太密對佢哋好不利，隨時冇晒反抗能力。
作客差畀老闆照肺

曼聯日前喺英超主場以3:1打沉般尼，睇比數以為佢哋好叻，實情網民覺得佢哋贏在夠運，而且踢法似足低組別球隊玩高Q大棍，史高斯講波時更加用「可憐」形容依家嘅紅魔。至弊係射手尹佩斯同後衞菲爾鍾斯喺比賽中傷埋，呢場睇怕唔使預佢哋。

其實曼聯唔能夠真正反彈，好大原因係作客唔對辦，對上7場作客得2勝5和，上一圈連乙組嘅劍橋聯都贏唔到，領隊尹戈爾甚至被格拉沙家族成員嗌去照肺，聞到魷魚香，傳聞更加話紅魔已打算搵皇馬教練安察洛堤接手。咁大鑊，信多尹戈爾一次啦！