自由盃上演巴西打吡 哥連 聖保羅拍檔歎細界

猪拉多纳

聽朝南美自由盃B組首輪上演巴西打吡，哥連泰斯喺主場硬撼聖保羅。兩軍過往每次碰頭例牌踢到飛沙劈石，上年3度交鋒夾手夾腳製造12球，可惜佢哋今場齊齊缺少前線靈魂人物，唔似有入球騷睇，一於熱捧1.5倍入球細！

（開賽時間：周四早上8:00）

哥連泰斯上季首席射手荷西古里路，最近同球會就續約問題處於拉鋸局面，本來咁樣已經唔係好事，最弊嘅係佢喺外圍賽首回合鬥卡達斯領紅被罰停賽3場，首兩輪分組賽都要坐波監，新鋒將路夫加盟又唔夠兩個禮拜，同隊友未培養到默契，睇怕今場前線難有作為。
聖保羅單靠老將攻堅

之不過聖保羅條鋒線亦唔好得幾多，其中上月底加盟後表現標青嘅翼鋒阿祖安辛杜利安今場要坐波監，削弱隊波嘅邊路進攻火力之餘，目前喺聖保羅省聯賽射手榜帶頭嘅柏圖，亦由於借用條款關係冇得落場，今場要齋靠老將路爾斯法比安奴喺前線孭飛，火力唔多夠保證喎，唔捧細捧咩先？
自由盃B組

南美自由盃賽制：現為分組賽階段，32隊分8組，每組4隊進行雙循環比賽，每組首名及次名晉級16強。