曼城未夠料贏巴塞

猪拉多纳

HeHe好兄弟 今晚擘晒面

好兄弟擘面？兩場咁多喇！今晚歐聯16強首回合重頭戲，英超曼城主場再遇巴塞隆拿，焦點落喺雙方王牌美斯同阿古路身上，兩位阿根廷射手由細玩到大，感情好過親兄弟，不過落到歐聯賽場就「HeHe巴打」都冇情講，而兩軍陣中嘅多名西班牙國腳亦會同室操戈，真係好睇過戲。曼城今仗致命傷係中場核心耶耶托尼續坐波監，遇着歐戰經驗豐嘅「地上最強」，主場受讓平半都捧唔過。

（有線61、64、201及203台周三凌晨3時45分直播）
美斯阿古路「老夫老妻」

美斯同阿古路去（Kun神）有幾friend？二人識於微時，齊齊由無名小卒爬到球壇巨星，為阿根廷捧走05世青盃、08年奧運金牌同年世盃亞軍，Kun神自傳中話05年第一眼就認定美斯係兄弟，並用「結咗婚80年嘅老夫老妻」嚟比喻兩人關係，今年情人節，阿Kun神竟然專登飛咗去巴塞隆拿同美斯慶祝，甚至去埋佢屋企住，真係都幾令人毛管戙，可見兩人關係非常「親密」。不過呢兩位「HeHe巴打」今晚正面交鋒，必須要將友情放低。

同樣要放低友情嘅唔止佢兩個，事關曼城嘅薩巴列達同巴塞嘅馬斯真蘭奴私底下好老友。唔好唔記得曼城擁有西班牙兩大進攻中場大衞施華同捷西斯拿華斯，佢哋同碧基、恩尼斯達同佐迪艾巴都係國家隊嘅親密戰友，但今仗各為其主，內訌係無可避免。
耶耶唔出得影響極大

記得上屆16強對碰嗰陣，撞啱阿古路受傷缺態，故巴塞輕易淘汰曼城。如今「Kun神」雖然重新上力，但偏偏輪到中場核心耶耶托尼要「坐波監」無緣披甲，睇番佢早前因去咗踢非國盃缺陣，曼城竟5場不勝，可見佢喺陣中嘅影響力極大。

曼城地面組織風格類似巴塞，但後者無論穩定性同定默契度都食住「藍月亮」，上屆兩回合雙殺有辦你睇。儘管巴塞上場聯賽爆冷輸畀馬拉加，11連勝斷纜，但只會激起鋒線「MSN」美斯、蘇亞雷斯同尼馬嘅怒火。況且曼城主帥比歷連尼豪言唔會做縮頭龜，但與火力全開嘅巴塞鬥攻盞死快啲，加上巴塞今季甚少連衰兩鑊，斯維力撐佢哋可於首回合戰勝曼城先拔頭籌，小讓平半有買趁早。
判官look一look：佩治

國籍：德國

年齡：39

曾執法主要大賽：德甲、歐聯、歐霸盃、16歐國盃外圍賽、14世盃、13洲際國家盃

執法場數：81

黃牌數：280

平均黃牌：3.46

紅牌數：18

平均紅牌數：0.22

判12碼：27

平均判12碼次數：0.33

今屆執法場數：4

黃牌數：16

紅牌數：0

判12碼：2