飛燕諾 羅馬做慣「大」豪客

猪拉多纳

意甲爭標分子羅馬上個禮拜喺歐霸盃32強首回合主場同飛燕諾踢成1:1，失咗粒作客入球，就算近況唔多掂，但今晚次回合造訪荷蘭，為咗收復失地根本冇得縮，撞正飛燕諾喺主場鍾意大踢性感足球，今場一於捧2倍入球大，等睇入球騷！

（有線61及201周五凌晨4:05直播）
翼鋒伊度比傷愈

連同首回合被飛燕諾逼和，羅馬近6場歐洲賽未贏過之餘，近10戰亦只得1勝8和1負，今場係咪能夠砌低對手晉級，真係話唔埋。不過「雌狼」鋒線猛將如雲，除托迪、謝雲奴同杜姆比亞都候命搏殺外，翼鋒伊度比亦克服膝傷隨隊出發荷蘭，大大增加進攻本錢，趁住飛燕諾兩名中後場主將恩馬斯同韋舒基亞停賽，今場要入波唔係難事。

揸住粒作客入球喺手嘅飛燕諾，形勢上睇落唔使急，但呢隊波近期主場鍾意踢性感足球，近4場贏晒勁轟10球嘅同時，但就場場有失波，今場鬥焗攻嘅羅馬，唔似保得住個清白身。

不過喺首回合有入波嘅卡森李察士，同前線拍檔艾亞馬迪都弗到漏，近4戰主場夾手夾腳斬獲4球，加埋擅於後上數胡嘅杜蘭斯查，火力唔輸蝕得過「雌狼」，兩隊鋒將蓄勢待發，2倍「大」波博得過吖！
首回合：飛客和1:1