英超護級快車開動

猪拉多纳

英超快車今周全速開動，今晚焦點，當然係兩場護級搶分大戰啦！除咗阿士東維拉喺主場對西布朗，侯城迎戰新特蘭都要踩行油搶分，不過查實4隊波半斤八両、唔叻得去邊，簡單啲，揀晒受讓嘅西布朗同新特蘭「讓客」啦！
賓迪基陷入球荒 維拉讓唔起西布朗

阿士東維拉喺英超主場對西布朗，好難W得出。雖然維拉喺新領隊舒活上任後，總算喺英總砌低李斯特城贏番場，但佢哋喺對上兩場聯賽又再連環輸波，搞到舒活嗌晒救命，話唔知幾時至撻得着班前鋒，咁嘅環境，都係熱捧西布朗1.44倍「讓客」仲有着數。

（now621台周三凌晨3:45直播）

維拉輸完畀史篤城後，日前喺主場又以0:1不敵紐卡素，就算換咗領隊之後，首席射手賓迪基依然冇起色，開季至今離譜到得兩個入球，最近再次遇上入球荒，就連舒活都出聲，暗示冇辦法搞得掂幾位鋒線大帝，讓波梗係擇使啦！
西布朗近4戰3勝

仲有，其實家陣維拉條防線仲有幾件傷兵，就算華亞爾坐完波監復出，睇落依然好牙煙，正式係攻又唔得、守又唔掂。對家西布朗最近強勢反彈，簽入前曼聯中場費查後又旺到爆，2月份4場波獲3勝1和，射手比拉希奴同伊迪耶亦交足功課，使驚維拉咩？
Data King：維拉鋒力英超最弱

‧維拉27輪聯賽僅入13球，鋒力係全英超最屎嗰隊。

‧西布朗2015年11戰，僅輸1場。

‧雙方近6次交手有4次開半和。