多蒙特搶德盃勢炒丙組仔

猪拉多纳

重生蜜蜂勇不可擋！上半季衰到貼地嘅多蒙特最近強勢回歸，但想重奪聯賽錦標係人都知冇乜可能，搶歐聯冠軍難度又太高，橫計掂計，德國盃就係多蒙特捧盃嘅最大希望，今晚佢哋喺第3圈作客丙組仔特雷斯登，戰意唔成疑問，1.6倍「讓客」咪走寶。

（TVB13周三凌晨3:30直播）

多蒙特上仗大炒死敵史浩克3:0，豪取聯賽4連勝，最令擁躉開心嘅係隊波鋒力返晒嚟，4場勝仗至少隊對手3粒，兩大巨星馬高列奧斯、奧巴美揚仲場場有飯開，入球停不了，想勒都勒唔住！最重要一點，係「蜜蜂兵團」依家德甲爭標無望，歐聯又落後畀祖雲達斯1:2，唔想季尾兩手空空，點可以放棄德國盃先？

對家丙組仔特雷斯登，實力差一大截，佢哋仲要喺歇冬後表現走晒樣，係上仗砌低雷根斯堡先叫中止4連敗頹勢，睇埋佢哋歇冬後5戰全部有失波，近4仗仲只係得前鋒伊利斯1個識「士哥」，一旦佢被盯死，隨時連破蛋都冇力啦！