祖記「野獸」翻生摘「紫百合」

猪拉多纳

元宵節有咩節目先？意大利盃4強首回合上演冠軍前哨戰，祖雲達斯喺主場對費倫天拿，去完街最啱睇。最近泰維斯強勢翻生，聽聞祖記高層諗緊辦法氹佢打消離隊念頭，想佢留低？梗係捧得愈多盃愈好，今仗對「紫百合」，肯定藉地利省多幾粒，吼2.3倍「讓主」！

（now633台周五凌晨3:45直播）
「埃及美斯」冬季最佳交易

祖記冧莊意甲形勢大好，加上喺歐聯16強首回合以2:1砌低多蒙特，有條件兼顧埋意大利盃。最緊要係泰維斯最近先後攻破過AC米蘭、多蒙特同羅馬大門，就算中場派路同保羅普巴養傷都唔怕。祖記行政總監馬路達話諗緊辦法氹泰維斯留低，假如會方唔想失去「野獸」，最好辦法就係捧多啲盃，令佢覺得隊波有作為，從而回心轉意。

對家費倫天拿連續12場不敗，借用嘅車路士翼鋒穆罕默德沙拿近5場入4球，呢位「埃及美斯」仲以近5成選票成為意甲冬季最佳交易。弊在「紫百合」有唔少傷兵，近4次作客祖記又得1和3負，首回合作客可能輸少當贏算數。