甘岡博冧莊勢爆歐塞爾

猪拉多纳

法足盃4強，甘岡呢支上屆冠軍依家喺聯賽排中游無欲無求，可將全副心機放喺此盃求衞冕，今晚佢哋會作客法乙歐塞爾爭入決賽。後者於今屆晉級路途上從未遇過甲組隊，今次越級挑戰隨時見底，波童捧甘岡贏波開客W。

（TVB 302周三凌晨3時直播）

甘岡依家喺聯賽排緊第11，已經唔使擔心護級，爭取衞冕法足盃係佢哋餘下球季唯一目標。佢哋上周末聯賽10人應戰下不敵里昂，教練哥雲歷喺下半場先後調走3名進攻主力文丹尼、居利斯及辛基夏利，相信係為今仗部署。

歐塞爾現排法乙第8，落後聯賽第3名4分，仲有些微升班機會，佢哋最近兩場主場聯賽都贏波，表面上睇狀態唔錯，不過佢哋喺今屆法足盃考驗不大，最大難關只係上一圈面對同級隊伍比斯特，要踢至互射12碼淘汰對手，之前幾輪贏嘅全屬法丙或非聯賽之流，入4強並冇說服力。加上佢實力和法甲始終有距離，爆冷機會唔大。