紅牛搶韁反轉洛杉磯銀河

猪拉多纳

美職 05:00（日）65 紐約紅牛 Vs 洛杉磯銀河

亨利掛靴，唔少球迷都諗住紐約紅牛成績會大跌，點知呢隻「牛」真係好似飲咗能量飲品咁愈戰愈勇，目前仲成為今季美職唯一一支不敗之師添。聽朝佢哋喺主場恭候作客腳軟嘅洛杉磯銀河，讓平半都冇有怕，照捧2倍上盤。
銀河作客3戰不勝

紅牛開季取得3勝2和不敗佳績，2次主場出擊全勝兼1球不失，表現相當可靠。射手巴利胡禮菲臘斯冇咗亨利睇住之後，反而踢得更放，佢同隊友米克格拿、萊特森組成新嘅三叉戟，合共轟入7球波，齊齊用實際行動話畀大家聽，就算冇「大帝」，火力咪一樣咁堅！

另邊廂嘅銀河雖然2連勝，之但係佢哋淨係識喺自己地頭作惡，客戰表現例必打折扣，今季作客3場未贏過已經令人跌眼鏡，近2仗作客輸波仲衰到連蛋都破唔到，睇怕今次都幾難全身而退咯。