施禾利盃賽專家冧莊

猪拉多纳

荷蘭盃今晚於鹿特丹飛燕諾球場舉行決賽，由施禾利、格羅寧根爭奪冠軍。施禾利係上屆荷盃盟主，今屆衞冕之路表現亦非常對辦，平手盤捧施禾利。

（周一凌晨零時開賽、馬會網上文字直播）

唔講大家未必記得，施禾利係上屆荷蘭盃冠軍，而且仲要喺決賽大勝阿積士五比一捧盃，嚟到今季佢哋曾於荷超盃再贏阿積士，上圈四強淘汰另一傳統勁旅川迪出局，堪稱盃賽專家。格羅寧根對上三圈比賽雖然分別淨勝精英隊、維迪斯及禾寧丹，但要留意呢三場比賽都喺佢哋主場進行，今次去到中立場爭標未必有着數。今季聯賽首循環碰頭，施禾利曾於主場以二比○擊敗對手，心理上有優勢，平手盤一於捧施禾利。