首季港超煞科戰 唔睇邊有話題先

猪拉多纳

傑志攞冠軍、和富大埔降班，連亞協盃資格賽席位都一早定埋，首季港超聯今日「煞科」，咪一啲睇頭都冇囉？咁諗就大錯特錯喇！雖然今日冇兩季前嘅「大審判日」咁激，但四場波各有看點，就算你冇可能睇晒四場波都好，之後都一定要跟番個戰果同消息，如果唔係甩咗，就唔好同人講自己撐本地波啦！
易主在即 太陽飛馬「最後探戈」

太陽飛馬較早前傳出咗季後易主嘅消息，聽講話有關人士亦喺度為呢單交易努力當中，雖然仲未有咩可以公布，但係太陽飛馬總監兼主教練陳志康（CowSir、下圖右）就話：「現階段仲未有嘢可以公布，但相信球員識得諗，會好好去踢季內剩低嘅比賽，用表現去吸引球隊嘅『買家』或者其他球會。」CowSir亦講話佢季後將會專心發展太陽國際體育會嘅工作。

加盟太陽飛馬之後一直用入球嚟證明身價嘅前波斯尼亞國腳拉斯錫，亦都有嘢講：「球會易手在即，我同隊友都好唔捨得，但好多嘢唔係可以控制到，我哋唯一可以做，就係珍惜餘下着住太陽飛馬波衫比賽嘅機會，只有咁樣，先可以無憾！」
黃大仙踢身價波

黃大仙方面，多名球員今季表現出色，大踢爭氣波，因而吸引到其他球會嘅垂青，今日主場謝幕，為己為球隊，肯定唔會咁易放過對手。

時間：下午2:30

場地：斧山道運動場

票價：$60、$20（特惠票）