多蒙特瘋狂大騷獻高普

猪拉多纳

除咗護級，今晚仲有一場歐霸入場券爭奪戰，多蒙特主場對雲達不來梅（有線64及203台直播），兩軍目前同以43分排第七及第八位，要壓倒對手兼力追排第六嘅奧格斯堡，今仗同樣非勝不可必對攻，而且今場亦係多蒙特功勳教頭高普同隊長基爾嘅主場告別戰，西法倫球場八萬球迷，加上高普一眾子弟兵，都會傾盡全力為佢哋獻上難忘回憶，預期呢場係瘋狂入球騷，難怪大細中位數開到3.5球都只係得1.77倍，若兼大盤太熱，可以小注兼顧有8倍嘅總入球7+。
拜仁領獎日爭體面勝仗

至於已經提早奪冠嘅拜仁慕尼黑，將於主場迎戰緬恩斯（有線63台直播），安聯球場賽後將會進行頒獎及啤酒浴，不過拜仁教練哥迪奧拿同一眾球員近期都唔好過，聯賽恥辱性三連敗後受千夫所指，今晚點都要爭取一場體面大勝至可以開心慶祝，遇上近況唔曳兼冇晒壓力嘅緬恩斯，預期同樣係一場入球盛宴！