諾域治搶14.4億英超堡藏

猪拉多纳

英冠升班附加賽決賽今晚喺倫敦溫布萊球場上演，由米杜士堡對諾域治。雖然米堡領隊卡蘭卡有車路士教頭莫連奴撐腰，不過諾域治領隊阿歷士尼爾更加神奇，上年幫咸美頓升上蘇超，依家又有機會幫諾域治拎到英超席位，腳頭咁好，平手盤一於博1.81倍嘅客隊。

（TVB301及廣東體育周一晚10:00直播）
米堡射手班福特有傷

曾經喺皇家馬德里做過莫連奴助教嘅米堡領隊卡蘭卡，今年借咗3個車路士球員，成為躋身升班附加賽嘅關鍵。不過咁，其實佢哋喺附加賽入面，一眾車仔借將都冇落場，而且今季攻入17個聯賽入球嘅射手班福特，仲未可以全面復操，就算今場紮住上，威脅力始終打折扣，想贏波升班攞到英超1.2億鎊（約14.4億港元）分紅唔係咁易喎。
教頭曾帶咸美頓升蘇超

相比之下，33歲嘅諾領隊阿歷士尼爾，名氣差不特止，佢喺球員時代仲冇咩人識，不過上季佢以領隊兼球員身份，帶領咸美頓升上蘇超，今年1月轉任諾域治領隊，又成功帶領班波殺番上前列，名副其實係「神奇領隊」。仲有呀，首席射手加比賓波監刑滿復出，簡直連個天都想幫佢咁。正所謂好波不如好運，不如信阿歷士尼爾再創奇迹仲好啦！