柏雷素爾玩大佢

猪拉多纳

藍翼追數狂轟猛炸

今晚亞冠盃16強次回合重頭戲梗係「日韓大戰」，日職嘅柏雷素爾返到主場迎戰南韓球隊水原藍翼，水原藍翼喺首回合遭柏軍反勝3比2，今場要翻盤唔攻唔得，咪諗咁多，一於捧入球大喇！

（now 672周二晚6時直播）

踏入5月就開始頹勢嘅柏雷素爾上場對水原藍翼突然「爆seed」，雖然開波2分鐘就失波，但之後竟然連入3球反超前，當中巴西前鋒李安度蒙迪拉梅開二度，柏雷素爾最後贏3比2，取得重大勝利之餘，更攞到3個重要作客入球。
柏軍後防穿窿難保不失

唔使講柏雷素爾今場肯定想穩守，費事畀水原藍翼偷到雞，不過球隊嘅後衞增島龍也同門將桐畑和繁皆因傷缺陣，柏軍今場想頂住水原藍翼狂攻睇怕都好難。

今年係水原藍翼成立20年周年，雖然球會歷史不及柏軍咁悠久，但取得嘅成就肯定高過對方多多聲，95年成立嘅水原藍翼只係用咗短短幾年時間就登上亞洲球壇嘅頂峰，喺2001年同2002年連續兩年成為亞冠盃冠軍，喺國內亦奪得多個冠軍，非常威水。今場對住柏雷素爾，無論係為出線定為面子，點都要奮力一搏，力求爭取作客入球，今場大盤值得捧場！