飛腳主場踩多嘢

猪拉多纳

作客都踢瓜FC首爾

科娜成日都覺得日職球隊嘅名「巧打耳」，有不同動物好似鯨魚、馬、天鵝，亦有水手、前鋒，仲有心跳同飛腳等，其中大阪飛腳中嘅「飛腳」，其實係努力咁解。今晚大阪飛腳會喺亞冠盃16強次回合主場迎戰FC首爾，FC首爾喺首回合主場就畀大阪呢隻「飛腳」踢中3腳，輸1比3，今場作客睇怕都係咁先，1.68倍嘅主勝咪走雞！

（now 672周三晚6時直播）

大阪飛腳，英文係Gamba Osaka，原來Gamba係意大利文，意思係腳，日文嘅意思就係同我哋香港人成日講嘅「奸爸爹」差唔多，解作努力、加油，今晚日職粉絲一於齊齊幫呢隊波「飛腳」喇！

大阪飛腳上季威到盡，堪稱神奇一季，竟然以升班馬姿態成為日本三冠王，勇奪日職、日聯盃同天皇盃3個冠軍，真係前無古人呀！今季季初開局雖然唔係咁順，不過隊波好快就Tune番好，仲試過各項賽事加埋錄得8連勝添。去到上場亞冠盃16強首回合作客面對實力較弱嘅FC首爾，雖然係作客，但班波都一樣冇面畀，輕鬆贏3比1，其中王牌射手宇佐美貴史更梅開二度。大阪飛腳出線在望，不過返到主場就點都要同主場球迷有交代，贏波係基本目標，科娜今場熱捧主勝！
FC廣州做東「大」報復

稍後時間開波嘅另一場次回合大戰，FC廣州（廣州恒大淘寶）返到主場硬撼FC城南，恒大上場輸得勁唔抵，雖然有後衞李學鵬喺65分鐘被逐離場，但一直都頂住1比1戰果，點知守到補時階段最後一刻輸12碼，搞到輸1比2完場。唔使講恒大今場為出線肯定會主攻，面對作客表現不穩、近兩作客均失兩球嘅FC城南，大盤值得捧場。

（周三晚8時開賽）